Tjuesjuande oktober

Tjuesjuande oktober 1933 vart den amerikanske pianisten Floyd Cramer fødd i Louisiana. Cramer sin CV inneheld pianospel for storleikar som Elvis Presley, Patsy Cline og Chet Atkins, men i mi platesamling er det på Johnny Cash sine plater Ride This Train og Now There Was A Song, begge frå 1960, tangentleiken hans kan høyrast. Cramer døyde i 1997. I 1970 kom Adrian Erlandsson til verda i Malmö. Erlandsson sitt trommespel kan hjå meg høyrast på Cradle Of Filth si fjerde studioplate Median. I 1977 fullførde The Who innspelinga av ein ny song, tittelen var New Song. Same dag var AC/DC på scenen i Golder’s Green Hippodrome i London. Dei frammøtte fekk, mellom anna, høyre Hell Ain’t A Bad Place To Be og Rocker, som også kan sjåast på DVD’en Plug Me In. I 1979 var dette dagen Motörhead si plate, Bomber, kom på marknaden. Eg har også ei kjelde, CD-boksen Protect The Innocent, som hevdar dette også var dagen dei same karane slepte den etter kvart legendariske liveplata No Sleep ’Till Hammersmith laus på folk. Diskografien på Motörhead sin eigen nettstad påstår at plata ikkje kom før tjuesjuande juni 1981. I 1979 var også Toy Dolls på scenen i Ryhope Popular Club i Sunderland. I 1986 var Toy Dolls attende og spelte for dei frammøtte i Alabamhalle i München. I 1989 var Toy Dolls innom Kiel og spelte på Max Music Hall. I 1992 slepte George Jones plata Walls Can Fall. I 1998 slepte R.E.M. plata Up.