Tjuefjerde august

Tjuefjerde august 1938 vart David Freiberg fødd i Cincinnati i Ohio. Jefferson Airplane-vokalisten Freiberg kan hjå meg høyrast på den uautoriserte konsertplata Somebody To Love-Live, og på David Crosby si solodebutplate If I Could Only Remember My Name frå 1971. I 1945 kom Kenneth William David Hensley til verda i nærleiken av storbyen London. Multiinstrumentalisten Ken Hensley er best kjend som keyboardspelar og låtskrivar i det engelske hardrockbandet Uriah Heep som han spelte saman med det hektiske tiåret frå 1970 til 1980. I skotske Montrose vart Malcolm Duncan fødd. Duncan spelte tenorsaksofon i Average White Band som hjå meg kan høyrast på samleplata The Very Best Of Average White Band. I 1951 kom Danny Joe Brown til verda i Jacksonville i Florida. Songaren Brown hadde til tider sitt eige Danny Joe Brown Band, men er best kjend for å syngje i Molly Hatchet i to periodar. Hjå meg kan Danny Joe Brown høyrast på studioplata Flirtin’ With Disaster (1979) og konsertplata Double Trouble Live frå 1985. Brown døyde av komplikasjonar i samband med diabetes i 2005. I 1956 var det Love Me Tender som stod på programmet for Elvis Presley sin innspelingssesjon. I 1961 vart Mark William Bedford fødd i London. Bassisten Mark Bedford har ei fortid i Madness og hjå meg høyrer du han på samleplata The Heavy Heavy Hits frå 1998. I 1963 kom John Bush til verda i Los Angeles. Songaren Bush var innom Anthrax ei stund, spelte inn tre plater, og kan hjå meg høyrast på enkelte spor på samleplata Return Of The Killer A’s. I 1968 vart Andreas Rudolf Kisser fødd i São Bernardo do Campo i sambalandet Brazil. Andreas Kisser erstatta Jairo Guedes som gitarist i Sepultura og kan hjå meg høyrast på plata Arise frå 1991. I 1981 kunne denne datoen by på konsert med Toy Dolls i Bentley Park i Doncaster. I 1984 stod Dovercot Arts Centre på Toy Dolls sin turnéplan. I 1992 gav Thunder ut plata Laughing On Judgement Day. Same dag døyde Larrie Londin, utan at det var noko å le av. I 1999 slepte Jimmy’s Chicken Shack plata Bring Your Own Stereo.