Syttande august

Syttande august 1954 kom Ronald Graham Strykert til verda i Australia. Gitaristen Ron Strykert spelte i Men At Work og hjå meg høyrer du arbeidet hans på samleplata Contraband: The Best Of Men At Work frå 1996. I 1955 vart Colin Ivor Moulding fødd i Swindon. Bassisten Colin Moulding er ein av grunnleggjarane av det engelske New Wave-bandet XTC og kan hjå meg høyrast på plata Black Sea frå 1980. I 1959 slepte Miles Davis plata Kind Of Blue, som av mange vert rekna som den beste plata trompetgeniet gav ut. I 1962 kom Gilbert Clarke til verda i Cleavland i Ohio. Gilby Clarke kan hjå meg høyrast på Guns N’Roses si femte studioplate The Spaghetti Incident frå 1993. I 1964 kom Maria Louisa McKee til verda i Los Angeles. Maria McKee er ein av grunnleggjarane av bandet Lone Justice og har også ei solokarriere som artist og komponist, men hjå meg er det som korist for Steve Earle på plata Copperhead Road frå 1988 ho kan høyrast. I 1987 slepte New Order samleplata Substance 1987. I 1990 spelte AC/DC inn ein promovideo til Thunderstruck. Regissør var også denne gongen David Mallet.