Tjuetredje januar

Tjuetredje januar 1888 vart Huddie William Ledbetter fødd i Mooringsport i Louisiana. Visesongaren Leadbelly introduserte verda for ei rekkje kraftfulle låtar som i dag er standarar innom folk-sjangeren. Hjå meg kan Leadbelly høyrast på samleplata Leadbelly Sings Folk Songs frå 1989. Leadbelly døyde i 1949. I 1925 kom Martin Louis Paich til verda i Oakland i California. Pianisten Marty Paich sitt bidrag til mi platehylle kan høyrast på Rickie Lee Jones si plate The Magazine frå 1984, samt utvalde spor på samleplata Genius – The Ultimate Collection, som dødsbuet etter Ray Charles slepte i 2009. Paich døyde i 1995. I 1926 vart bassisten Curtis Counce fødd i Los Angeles i California. Counce sitt kjenslege basspel kan hjå meg høyrast på Chet Baker si samleplate Best Of Chet Baker Plays frå 1992. Counce døyde i 1963. I 1953 var dette dagen Robin Wayne Zander kom til verda i Beloit i Wisconsin. Cheap Trick-vokalisten Robin Zander si gjennomtrengande røyst har hypnotisert jenter i alle aldrar sidan bandet starta og er perfekt til å framføre gitarist Rick Nielsen sine surrealistiske songar, og hjå meg høyrer du Zander si røyst på studioplata Latest (2009), konsertplata Live At Budokan (1978), samt den doble samleplata The Essential Cheap Trick. I 1956 vart Ralph Carney fødd i Akron i Ohio. Carney lev av å traktere ei rekkje blåseinstrument og kan i mi platehylle høyrast medan han spelar både trompet og saksofon på Tom Waits sine studioplater Rain Dogs (1985) og Mule Variations frå 1999. I 1957 kom Earl Falconer til verda i engelske Birmingham. Falconer syng i UB40 og kan i mi platehylle høyrast på samleplata The Best Of UB40 vol. 1 frå 1987. I 1959 fekk Johnny Cash hjelp av produsent Don Law til å spele inn ti songar i Nashville i Tennesee, alle kan høyrast på plata Hymns og vert her ramsa opp i tilfeldig rekkefølgje: I Saw A Man; Are All The Children In; Lead Me Gently Home; Snow In His Hair; I Call Him; These Things Shall Pass; He’ll Be A Friend; God Will; The Old Account; Swing Low, Sweet Chariot. Dei to siste kan også høyrast på samleplata God frå 2000. I 1964 kom Torgeir Andersen til verda. Andersen kan i mi platehylle høyrast med trompetspel på Tre Små Kinesere si femte studioplate Tro, Håp & Kærlighet frå 1996. I 1985 var Toy Dolls igjen over grensa til Sveits for å spele på Rote Fabrik i bankbyen Zürich. I 1986 spelte Toy Dolls på gata i Sacramento. I 2016 døyde Jimmy Bain.