Tjuetredje juli

Tjuetredje juli 1928 kom bassisten William James Edwards Lee III til verda i Snow Hill i Alabama. Bassisten Bill Lee sitt arbeid kan høyrast hjå artistar som Harry Bellafonte og Aretha Franklin, men i mi platesamling er det på Bob Dylan si plate Bring It All Back Home frå 1965 ein kan høyre han. I 1930 vart saksofonisten Richie Kamuca fødd i Philadelphia. Kamuca var ein del av West Coast jazz-scena og kan hjå meg høyrast på plata Best Of Chet Baker Plays frå 1992. Kamuca døyde i 1977. I 1946 kom Andrew Mackay til verda i idylliske Cornwall. Multiinstrumentalisten Andy Mackay er best kjend for tida han trakterte ulike blåseinstrument for Roxy Music og kan hjå meg høyrast på samleplata More Than This frå 1995. I 1950 kom Blair Thornton til verda i olympiabyen Vancouver. Thornton sitt gitarspel kan høyrast på samleplata The Very Best Of, som det kanadiske rockebandet Bachman-Turner Overdrive slepte i 2001. I 1952 vart Janis Siegel fødd i Brooklyn i New York City. Songerinna Siegel slo seg saman med vokalgruppa The Manhattan Transfer i 1973 og i mi platehylle høyres ho på plata The Offbeat Of Avenues frå 1991. I 1961 kom Martin Lee Gore til verda i motorbyen Dagenham. Martin Gore har skrive mesteparten av låtane som Depeche Mode har spelt inn og er bandet si eigentlege stjerne. I mi platehylle finn du Gore sitt arbeid på studioplatene A Broken Frame (1982), Music For The Masses (1987) og Playing The Angel (2005). I 1964 vart Tim Kellett fødd i Yorkshire. Tangentmannen Kellett kan hjå meg høyrast på Simply Red si plate Stars frå 1991. I 1965 kom Saul Hudson til verda i England. Hudson er best kjend som Slash og kan hjå meg høyrast som sjefsgitarist på dei fem fyrste platene Guns N’Roses slepte, han spelar også med bandet Velvet Revolver, som også har teke plass i platehylla mi med debutplata Contraband frå 2004. I 1968 vart trommeslagaren Nick Menza fødd i München. Menza er best kjend for å ha tromma takten for Megadeth frå 1988 til 1998 og kan i mi platesamling høyrast på plata Rust In Peace frå 1990. I 1970 var Jimi Hendrix i studio med Band Of Gypsies og spelte inn Angel, som seinare vart ein hit for den skotske fotballentusiasten Rod Stewart. I 1982 var det høve for publikum på Honeysuckle i Gateshead å høyre Toy Dolls. I 1984 hadde Toy Dolls teke turen til Hollywood for å spele på Logics. I 2011 døyde Amy Winehouse.