Tjueåttande juli

Tjueåttande juli 1943 vart Michael Bernard Bloomfield fødd i Chicago i Illinois. Gitaristen Mike Blomfield landa på ein respektabel tjueandreplass på renommerte Rolling Stone Magazine si liste over verdas hundre beste gitaristar frå 2003 og kan i mi platesamling høyrast medan han leikar med strengane på Bob Dylan si plate Highway 61 Revisited frå 1965. I 1949 kom Simon Frederic St Georg Kirke til verda i London. Simon Kirke har hausta heider som ein av verdas framste trommisar, kjend mellom anna for tida i Free. Hjå meg kan Kirke høyrast medan han trommar for supergruppa Bad Company på plata Straight Shooter frå 1975. I 1950 kom Roy Rogers til verda i Redding i California. Gitaristen Roy Rogers har operert som hjelpegitarist for artistar som John Lee Hooker, Sammy Haggar, Linda Ronstadt og fleire. I tillegg til å gje ut plater under eige namn, er Rogers også frontmann i trioen The Delta Rhythm Kings. Chops Not Chaps frå 1986 er Rogers sitt bidrag til mi platehylle. I 1966 spelte The Byrds inn I Know My Rider (I Know Your Rider) og Psychodrama City. Begge spora kan høyrast som tilleggsmateriale på plata Fifth Dimension. I 1969 slepte Grand Funk Railroad singelen Time Machine/ High On A Horse, for å promotere plata On Time. Singelen klatra til ein beskjeden førtiåttandeplass på listene. I 1979 vart Kjetil-Vidar Haraldstad fødd. Frost har tromma for fleire norske metallband, som Gorgoroth og Keep Of Kalessin, og spelar i dag i Satyricon og 1349. Det er på plata Demonir, som sistnemnde band slepte i 2010, du finn Frost sitt bidrag til mi platehylle. I 1983 spela Men at Work i Merriweather Post Pavillion i Columbia, Marryland, og hendinga vart spela inn av ABC Rock Radio Network. Songen I Like To (live) kan høyrast på B-sida av singelen Dr. Heckyll & Mr. Jive og samleplata Contraband: The Best Of Men At Work frå 1996. I 1986 gav Neil Young ut plata Landing On Water på plateselskapet til David Geffen.