Tjuefemte februar

Tjuefemte februar 1919 var jazzmusikaren Fred Katz fødd. Katz har ei mangslungen karriere med cello og piano mellom hendene. I mi platesamling kan Katz høyrast på Bob Dylan si plate Pat Garrett & Billy The Kid frå 1973. I 1943 kom George Harrison til verda i Liverpool. Harrison var gitarist i Beatles og har i ettertid gjeve ut plater på eiga hand. Han var også medlem av supergruppa The Travelling Wilburys. Harrison døyde av lungekreft i 2001. I 1949 vart Frank ”Poncho” Sampedro fødd. Poncho Sampedro er gitarist i Crazy Horse og hjelpte Neil Young med gromlyd frå både orgel og gitar på platene Zuma (1975), American Stars’N Bars (1977), Re-Ac-Tor (1981), This Note’s For You (1988) Sleeps With Angels frå 1994. I 1973 gav Alice Cooper ut plata Billion Dollar Babies, produsent var Bob Ezrin. I 1980 vart Heaton Buffs Club invadert av Toy Dolls fans. Klubben låg trygt plassert i den største byen i Nordaust-England, Newcastle-upon-Tyne. Same dag gav Bob Seger ut plata Against The Wind saman med resten av The Silver Bullet Band. I 1982 vert dagen hugsa for at Iron Maiden starta oppvarminga til den komande Beast on the Road turneen med tjue konsertar i heimlandet. I 1983 bydde datoen på konsert med Toy Dolls på Porterhouse i Retford. I 1990 gav det australske bandet Midnight Oil ut plata Blue Sky Mining.

Tjuesjette februar

Tjuesjette februar 1932 vart Johnny Cash fødd som John R. Cash i Kingsland, Arkansas. Johnny Cash er kjent som The Man In Black og skal ha spela inn og gjeve ut meir enn fem tusen innspelingar på eit utal plater i så ulike sjangrar som rock, country og gospel. Cash sitt andre ekteskap var med songerinna June Carter. Siste del av karieren hans er prega av det suksessfulle samarbeidet med superprodusenten Rick Rubin, som gav The Man In Black ein solid renesanse. Heime hjå meg står meir enn tretti originaltitlar på rekke og rad og prydar platehylla, og fleire vert det nok, for Johnny Cash er ein artist eg aldri vert lei av. Cash døyde i 2003. I 1971 kom Erica Abi Wright til verda i Dallas. Erykah Badu vert referert til som Queen Of Neo-Soul og platedebuterte i 1997 med plata Baduizm. Dette er også datoen der, i 1980, Toy Dolls kunne nytast i Alexandra Ballroom i Sunderland. I 1983 var turen komen for Toy Dolls konsert i Traders Hall i Consett og i 1985 kunne Toy Dolls opplevast på King Georges Hall i Blackburn.

Tjuefjerde februar

Tjuefjerde februar 1902 vart produsenten Don Law fødd i London med fullt namn Donald Firth Law. Law produserte ei rekkje Johnny Cash plater, mellom anna Ride This Train. I 1942 kom Paul Pond til verda i den engelske hamnebyen Portsmouth. Pond har seinare, under namnet Paul Jones gjort seg merkt som vokalist i mellom anna Mannfred Mann. I 1979 var Paul Jones med å starte The Blues Band. I 1950 vart gitaristen George Thorogood fødd i Wilmington. Delaware-stasjonerte Thorogood har sidan 1974 hamra feite riff og dårlege vitsar laus på uskuldege tilhøyrarar og er best kjend for slageren Bad To The Bone, som har vore nytta som filmmusikk i fleire filmar enn eg kan telje på begge hender. Hjå meg er Thorogood representert med to gode samlingar som dekkar det meste og det beste, eller det verste, som mannen sjølv ville sagt, av det han har gjort saman med The Delaware Destroyers. I 1951 vart bassisten Steve Dawson fødd i Sheffield. Dawson var med å starte det engelske hardrockbandet Saxon og i mi platesamling kan han høyrast på plata Wheels Of Steel frå 1980. I 1969 var datoen for Johnny Cash sin konsert i San Quentin State Prison i California. I 1983 hadde karane i Toy Dolls teke turen til Skottland, nærare bestemt Glasgow der dei spela på Roxy. I 1985 var turen komen for ein Toy Dolls konsert på Queens Hotel i Westcliffe. I 1994 gav det engelske metallbandet Cradle Of Filth ut debutplata si, The Principle Of Evil Made Flesh.

Tjuetredje februar

Tjuetredje februar 1944 vart texasguten John Dawson Winter fødd i Beaumont. Johnny Winter er kjend som verdas kvitaste bluesgitarist, og tatoveringane hans er dei einaste pigmenta han har i huda. At Johnny også er ein av verdas beste bluesgitaristar, ranka som nummer syttifem av Rolling Stone Magazine i 2003, kjem ofte litt i bakgrunnen. Eg har ei fin samling av Johnny Winter sine plater, men er mest nøgd med liveplatene og angrar bittert på at eg ikkje reiste for å sjå og høyre legenda då han vitja bluesbygda Skånevik i Sunnhordland for ei tid sidan. I 1952 vart Aerosmith-gitaristen Brad Whitford fødd på denne dagen. I 1957 vart studio fylt av lyden av ein ung Elvis Presley som song One Night for innspeling på plate. I 1976 slepte Lynyrd Skynyrd singelen Double Trouble ut på marknaden. Same dag filma AC/DC eit promoklipp for It’s A Long Way To The Top (If You Wanna Rock’n Roll). Sekkepipebandet Rats Of Tobruk Pipe Band med mellom anna Allan Butterworth, L. Kenfield og Kevin Conlon er med som statistar. I 1980 kom Iron Maiden sin debutsingel på EMI, Running Free, som klatra til trettifjerdeplass på dei engelske singellistene. Bandet nytta også denne datoen til å spele live på det legendariske musikkprogrammet Top Of The Pops som det fyrste bandet sidan The Who gjorde det same i 1972. I 1985 bydde denne datoen på ein Toy Dolls konsert på Grannies i hamnebyen Portsmouth. I 1993 gav Grant Lee Buffalo ut plata Fuzzy, som var dei tidlegare Shiva Burlesque-medlemmene si debutplate under nytt namn. I 1997 døyde Tony Williams. I 2003 døyde Howie Epstein.

Tjueandre februar

Tjueandre februar 1952 kom trønderen Stein Groven til verda. Groven har operert under artistnamnet Casino Steel og kan i mi platesamling høyrast som medlem av Rigg Rock-duoen Holton & Steel. To av platene frå samarbeidet med Gary Holton har fått plass i mi samling, debutplata, som bar dei to herrane sitt namn og den vanskelege andreplata med den oppfinnsame tittelen Part II. I 1971 gav David Crosby ut si eigenproduserte debutsoloplate If I Could Only Remember My Name. I 1985 var London University vertskap for ein konsert med Toy Dolls. I 1993 platedebuterte Radiohead med plata Pablo Honey. I 2000 gav traktorpønkarane i Violent Femmes ut den ikkje så altfor vellukka plata Freak Magnet, som i skrivande stund er gruppa si siste studioplate.

Tjuefyrste februar

Tjuefyrste februar 1945 kom Uriah Heep sin originalbassist Paul Newton til verda i Andover. Newton spelte på dei tre fyrste Uriah Heep-platene, Very ’Heavy, Very ’Umble, Salisbury og Look At Yourself, som alle som er interessert kan få høyre om dei kjem innom og leitar i hyllene mine. I 1955 såg multiinstrumentalisten Larry Campbell dagens lys i metropolen New York City. Campbell, som trakterar så og seie alle strengeinstrument verda har å by på, fekk gleda av å bidra til mi platesamling gjennom å spele på Bob Dylan si plate Love And Theft frå 2001. I 1962 vart Mark Arm fødd i regnfulle Seattle og fekk fullt namn Mark McLaughlin. Mark Arm er best kjend for å ha tent til livets opphald som vokalist og gitarist i grungebandet Mudhoney, og han har i seinare tid turnert som gjestevokalist for eit attforeina MC5, men hjå meg må ein ty til plata Clean As A Broke-Dick Dog med supergruppa The Monkeywrench for å høyre han spele. I 1967 kom den walisiske gitaristen James Dean Bradfield til verda. Bradfield spelar og syng til vanleg i det walisiske marxistiske bandet Manic Street Preachers. I 1972 gav Led Zeppelin ut singelen Rock And Roll frå plata Led Zeppelin IV, på B-sida var Four Sticks, og plata klatra berre til ein beskjeden førtiandre plass på listene, utan at det burde skremme nokon frå å høyre på produktet. I 1980 sa West Cornfort Club i gruvebyen Durham velkomen til Toy Dolls. I 1981 var dette dagen Motörhead slepte The St. Valentines Day Massacre Ep laus på fansen. I 1985 kunne ein oppleve Toy Dolls på Electric Ballroom i London.

Tjuande februar

Tjuande februar 1951 kom Gregory Beckerleg til verda i bilbyen Detroit i Michigan. Bryan Gregory var med då ekteparet Lux Interior og Poison Ivy starta bandet The Cramps i 1976. Mi platesamling byr på Bryan Gregory sitt gitarspel på samleplata Off The Bone frå 1983. Bryan Gregory døyde like i nærleiken av Disneyland i Anaheim sør for storbyen Los Angeles i 2001. I 1953 vart Kristy Marlana Wallace fødd i San Bernardino i solrike California. Poison Ivy er truleg verdas sexyaste kvinnelege rockegitarist og var med å starte garagepunkbandet The Cramps i 1976. Saman med ektemannen Lux Interior var ho den einaste faste medlemmen i bandet fram til Interior døyde i 2009 og bandet vart oppløyst. Statusen for Poison Ivy sitt gitarspel i mi platehylle er, enn så lenge, den same som for bankollegaen Bryan Gregory. I 1967 var dette dagen Nirvana-sjefen Kurt Donald Cobain kom til verda. Cobain døyde i 1994. Eg var i heimbyen hans, Aberdeen, på den amerikanske vestkysten i 1995 og har ikkje noko problem med å forstå at ungdom frå ein så nitrist stad tek livet av seg. I 1985 var Toy Dolls og spela i Umist i Manchester. I 2002 gav danske D-A-D (Disneyland After Dark) ut plata Soft Dogs, produsent var Nick Foss. I 2006 kom det bergenske trashmetallbandet Manngard si debutplate, Circling Buzzards.

Nittande februar

Nittande februar 1948 vart Black Sabbath-gitaristen Tony Iommi fødd som Frank Anthony Iommi i Aston, Birmingham. Iommi var ein snartur innom det alltid like hårfine bandet Jethro Tull før han rota seg i hop med Bill Ward og Gezer Butler for å starte Black Sabbath. Dei siste åra har han turnert under namnet Heaven & Hell. I 1958 gjekk Billie Holiday i studio og starta innspelinga av plata Lady In Satin, som kom på marknaden i juni same år. Plata var tilgjengeleg i to format, mono og stereo og skal vist nok vere songarinna sitt favorittalbum. I 1964 kom Pierre Lamy til verda. Under artistnamnet Polo har Lamy gjort seg merkt som vokalist i det franske alternativbandet Les Satellites som var aktive frå 1985 til 1994. Hjå meg kan Polo høyrast på plata Riches & Célèbres frå 1989. I 1974 spela Johnny Cash inn What On Earth Will You Do (For Heavens Sake). Songen, som var produsert av dei to Jack'ane Clement og Routh, kunne høyrast på plata Ragged Old Flag, som kom ut same år, og er elles å finne på samleplata God som kom ut i 2000. I 1978 kunne ein høyre Gasolin spele live i Tivoli. Songane Kina Rock, December I New York, Fi-Fi Dong, Girl You Got Me Lonely, Refrainet Er Fritt og Som Et Streif Af En Dråbe kan høyrast på samleplata Derudaf - Forever. I 1980 nytta AC/DC- vokalisten Bon Scott dagen til å døy i London etter den siste av hans mange fyllekuler. I 1983 heldt Toy Dolls konsert i Working Mens Club i Newbottle, ein konsert som vart den siste der originalmedlemmen Flip spelte bass. Dette hendte samstundes med at Madness låg trygt på åttandeplassen på listene med singelen Tomorrows Just Another Day.

Attande februar

Attande februar 1946 kom Steel-gitaristen Buddy Cage til verda i kanadiske Toronto. Cage sitt musikalske bidrag til mi platesamling finn ein på plata Blood On The Tracks som Bob Dylan gav ut i 1975. I 1970 stod Elvis Presley i studio og spela inn The Wonder In You. I 1974 var Johnny Cash i studio og spelte inn While I Got You On My Mind. Songen fekk plass på plata Ragged Old Flag og kan i tillegg høyrast på samleplata Love frå 2000. I 1985 kunne det opplevast ein Toy Dolls-konsert på Winter Gardens i Cleethorpes. Og i 1986 var dette dagen då Madness sin singel Sweetest Girl stogga på trettifemte plass. I 1992 gav det islandske bandet Sugarcubes, med den alltid like kreative og fascinerande songerinna Björk i spissen, ut si tredje og siste studioplate, Stick Around For Joy.

Syttande februar

Syttande februar 1950 vart multiinstrumentalisten Rickey Medlocke fødd i Jacksonville, nord i Florida. Medlocke, som er barnebarn av bluesartisten Shorty Medlocke, er best kjend for at han gjennom åra har vore gitarist og vokalist i Blackfoot, og at han har vore innom Lynyrd Skynyrd i to periodar, der han har traktert både trommer og gitar. I mi platesamling er Medlocke representert med gitarspel og vokal på Blackfoot si studioplate Marauder, i tillegg til den fantastiske konsertplata Highway Song, frå englandsturneen i 1982. Han spelar også på den tjuande Lynyrd Skynyrd-plata, Twenty, som kom i platehyllene i 1997. Den tidlegare Blackfoot-sjefen har framleis ei framtredande rolle i sørstatsrockarane Lynyrd Skynyrd. I 1960 spelte Johnny Cash inn songane I Feel Better All Over og My Shoes Keep Walking Back To You. Begge songane fekk plass på plata Now, There Was A Song og kan i tillegg høyrast på samleplata Love frå 2000. I 1972 kom Billie Joe Armstrong til verda i industribyen Oakland. Armstrong er frontmannen i Green Day og mi platesamling byr på studioplatene Dookie frå 1994 og Nimrod (1997), i tillegg til konsertplata Bullet In A Bible. I 1975 gav AC/DC ut debutplata si, High Voltage, på heimemarknaden i Australia. Resten av verda måtte vente til Atlantic Records lanserte ein internasjonal versjon i 1976, men denne hadde ei anna samansetjing av låtutvalet. I 1980 nytta Toy Dolls datoen til å dra attende til Old Club i Shildon for å spele for fansen. Året etter, i 1981, nytta Iron Maiden denne datoen til å legge ut på ein omfattande verdsturne. Fyrste konserten var i Ipswich, den fyrste av i alt tjuefire i England, før resten av den vide verda stod for tur, eitt hundre og tretten konsertar alt i alt. Mindre oppstuss, men like sveitt stemning var det truleg då trufaste Toy Dolls nytta denne kvelden til å spele på Wine Loft i Sunderland litt lengre nord på den engelske austkysten. Dette hendte same dag som Los Palmas 7 var nummer sju på dei engelske singellistene, same plassering som songen har fått på Madness si samleplate The Heavy Heavy Hits.

Femtande februar

Femtande februar 1960 var ein ung og effektiv Johnny Cash i studio saman med dei faste musikarane sine, gitaristen Luther Perkins og bassisten Marshall Grant. I tillegg hadde han med seg Johnny Western på gitar, Harold B. Jackson på dobro og steelguitar, Gordon N. Terry på fele, pianisten Floyd Cramer og trommeslagaren Murray M. Harman. Saman rakk denne oktetten å spele inn heile seks songar denne vinterdagen. Lista tel Loading Coal, Slow Rider, Lumberjack, Dorraine Of Ponchartrain, When Papa Played The Dobro og Boss Jack. Alle songane kan høyrast på plata Ride This Train, som vart produsert av Don Law og kom i platehyllene seinare same året. I 1979 stod Judas Priest på scena i den japanske hovudstaden Tokyo. Dette var den andre av dei konsertdatoane som er lista opp som det som enda opp som konsertplata Unleashed In The East, som kom ut i oktober same år. Dei som i 1980 nytta denne datoen til å kose seg med den lokale underhaldninga på Castle Inn i Durham hugsar truleg at det var Toy Dolls som underheldt frå scenen. I 1981 døyde Mike Bloomfield. I 1985 nytta Toy Dolls denne datoen til å reise heilt til Englands nest største by, Birmingham, for å spele konsert på det lokale universitetet.

Fjortande februar

Fjortande februar 1973 kom The Batallion-vokalist Tore Bratseth (Stud Bronson) til verda. Verdas mest ihuga Twisted Sister-fan har base i Lysefjorden i Os Kommune sør for Bergen og kan treffast på butikken på Buena når han ikkje er ute og turnerar eller stalkar idola sine. I 1981 hadde Toy Dolls teke inn på hotell, og det var Norseman Hotel i Peterlee som fekk vitjing og det skulle ikkje vere naudsynt å påpeike at dei sjølve stod for underhaldninga. I 1985 var Toy Dolls attende i gamlelandet etter ein utanlandstur og drog for å spele på Guildhall i Cambridge. I 2010 døyde vokalist Doug Figer i The Knack. The Knack er mest kjend for hiten My Sharona frå debutplata Get The Knack frå 1979.

Trettande februar

Trettande februar 1950 vart den australske bassisten Robert John Daisley fødd i storbyen Sydney. Bob Daisley har spela bass for ei rekkje ulike band i ulike sjangrar og er hjå meg representert på fleire plater med The Prince Of Darknes, sjølvaste Ozzy Osbourne. I tillegg har Daisley spelt på Rainbow-plata Long Live Rock’n Roll frå 1978 og Uriah Heep si fjortande plate, Abiminog frå 1982. Han spelte også på Black Sabbath si plate Iternal Idol frå 1987, ei plate eg også sjølvsagt er stolt eigar av. I 1956 kom bassisten Peter Hook til verda i Salford. Hook var ein av grunnleggjarane av Joy Divison og kan hjå meg høyrast på samlaplata Substance frå 1988. I 1970 gav Black Sabbath ut den sjølvtittelerte debutplata si og ei lang teneste i dei tunge riffa si teneste starta for dei unge rockarane frå Midt-England. I 1974 vart den engelske artisten Robert Peter Williams fødd i Stoke-on-Trent. Robbie Williams starta karrieren som ungjenteidol i dansebandet Take That, men har seinare etablert seg som soloartist. I 1978 kunne lukkelege tilhøyrarar høyre Gasolin i Greve. Der framførde dei mellom anna Get On The Train og Jumbo Nummer Nul. Måndag trettande februar 1984 gjekk Judas Priest på scenen i Stadhalle i Offenbach. Oppvarmar var Ted ”Cat Scratch Fever” Nugent. I 1989 sa Uriah Heep seg fornøgd og avslutta innspelinga av albumet Raging Silence. I 2001 gav John Fruiscante ut plata To Record Only Water For Ten Days. I 2002 døyde countrystjerna Waylon Jennings.

Tolvte februar

Tolvte februar 1952 vart perkusjonisten Stephen Hodges fødd. Hodges er best kjend for å ha samarbeida med Tom Waits på ei rekkje innspelingar og kan i mi platesamling høyrast på plater som Swordfishtrombones (1983), Rain Dogs (1985) og Mule Variations (1999). I 1956 kom den skotske gitaristen Brian Robertson til verda i Clarkston. Robbo har traktert gitaren i Thin Lizzy og Motörhead og kan også høyrast medan han assisterar Shane MacGowan på plata The Snake frå 1995. I 1959 kom trommeslagaren Omar Hakim til verda i New York City. Hakim har spelt med fleire rock, pop og jazzstjerner og kan i mi platesamling høyrast på plata Amandala som Miles Davis gav ut i 1989.

Ellevte februar

Ellevte februar 1956 vart trommeslagaren David Uosikkinen fødd i Cheltenham i Pensylvania. Uosikkenen er ein av originalmedlemmene i det amerikanske bandet The Hooters og held takten på to bidrag til mi platehylle, Zig Zag frå 1989 og Out Of Body frå 1993. I 1962 kom Sheryl Suzanne Crow til verda. Sheryl Crow, som har vore meir i europeisk media på grunn av spekulasjonar rundt ekskjærasten sitt påståtte kombinasjon av sykkelkarriere og dopbruk, har vunne så mykje som ni Grammyprisar. I tillegg til soloprosjekta sine har ho spela med artistar som Mick Jagger, Eric Clapton og Kid Rock. I mi platehylle kan Crow høyrast medan ho syng og spelar accordion på Johnny Cash si plate American III: Solitary Man frå 2000. I 1968 produserte Kit Lambert The Who låta Little Billy i IBC Studios i London. I 1984 var det songen om den engelske skodespelaren Michael Caine som sikra Madness ellevteplass på hitlistene. I 1997 platedebuterte Erykah Badu med den kanonsterke plata Baduizm.

Tiande februar

Tiande februar 1940 kom gitaristen Kenny Rankin til verda i Los Angeles. Rankin kan i mi platesamling høyrast på Bob Dylan si plate Bring It All Back Home frå 1965. Rankin døyde i 2009. I 1949 var dette fødselsdagen til Nigel Olsson som spelte trommer på fleire av songane på Uriah Heep-plata Very ’eavy… Very ’Umble frå 1970. I 1970 var dette dagen Mott The Hoople spela inn Wrong Side Of The River i Olympic Studios. Songen enda opp på plata Wildlife som kom ut året etter. I 1978 gav Judas Priest ut den fjerde studioplata si, Stained Class. I 1979 spelte Judas Priest i levande live i Tokyo og delar av konserten kan høyrast på plata Unleashed In The East som kom på marknaden seinare same året. I 1992 platedebuterte dei walisiske marxistane i Manic Steet Preachers med plata Generations Terrorist. I 1997 kom Blur si femte studioplate, som hadde same namn som bandet og var opphavet til den artige Beetlebum. I 2004 gav Melissa Etheridge ut plata Lucky, ei plate som fekk særs lite mediadekning då opphavsdama måtte avlyse all form for pressearbeid til fordel for behandling for brystkreft.

Niande februar

Niande februar 1958 var det jubel i familien Evans i Clarendon Hills i Illinois då Bill Evans kom til verda. Evans har seinare gjort seg merkt som ein av verdas beste jazzsaksofonistar og fekk høve til å spele saman med Miles Davis. Hjå meg kan Evans høyrast på Miles Davis si plate Decoy frå 1984. I 1980 spelte AC/DC i den spanske hovudstaden, Madrid. Hendinga vart filma og Girls Got Rhythm og Highway To Hell kan sjåast på DVD’en Family Jewels. Same dag var det North Kenton Club i Newcastle som fekk vitjing av Toy Dolls. I 1981 slepte The Stranglers plata The Gospel According To The Meninblack. I 1991gav Deacon Blue ut studioplate nummer tre, som fekk tittelen Fellow Hoodlums. I 1994 slepte det finske powermetal-bandet Stratovarius plata Dreamspace.

Sjuande februar

Sjuande februar 1948 kom komponisten og produsenten David Campbell til verda. Campbell har produsert plater for Kiss, Metallica og Linkin Park, med fleire, og i mi platehylle kan han høyrast medan han spelar fiolin på den langt meir meriterte sonen, Bech, si plate Midnite Vultures frå 1999. I 1949 kom Alan Charles Lancaster til verda i London. Lancaster stod i mange år for grom basslyd for verdas beste boogierockband, Status Quo. Eit band han var med å starte så tidleg som i 1962. Lancaster gav seg i Status Quo etter Live Aid i 1985 og heldt fram med fleire prosjekt, han kan i mi platesamling mellom anna høyrast når han spelar med bandet The Bombers, som gav ut plata Aim High i 1990. I 1961 gav Elvis Presley ut singelen Surrender som låg to veker på listetoppen i USA, fire i England. Songen er ei omsetjing av den napolitanske balladen Torna A Sorriento, men ”kongen” sin versjon er nok den som er best kjend for dei fleste. I 1969 var The Who i Morgan Studios i London og spela inn Pinball Wizard. Bak spakane sat produsent Kit Lambert. På denne datoen i 1980 kunne ein la seg underhalde av Toy Dolls der dei stod på scenen på Finos i Sunderland, men kva som kom fyrst, klubben Finos eller songen der dei hevdar at She Goes To Finos, veit eg faktisk ikkje.

Sjette februar

Sjette februar 1928 kom bassisten Nelson Boyd til verda i Camden i New Jersey. Boyd var innom både Carlie Parker og Dizzie Gillespie sine orkester, men i mi platesamling er det på Miles Davis si plate Birth Of The Cool basspelet hans kan høyrast. Boyd døyde i 1985. I 1945 kom den jamaikanske reggaeartisten Nesta Robert Marley til verda i Nine Mile i Jamaica. Bob Marley er den internasjonalt best kjende reggaeartisten verda har sett og, i tillegg til det faste bandet, The Wailers, spelte han saman med dei to landsmennen Bunny Wailer og Peter Tosh. I 1953 vart AC/DC-gitarist og grunnleggar Malcolm Mitchell Young fødd i den skotske storbyen Glasgow. Saman med broren Angus har Malcolm Young hatt kontroll med AC/DC sidan den spede debuten i Melbourne i 1973 og saman har dei stått for klassikarar som Highway To Hell (1979) og Back In Black (1980). I 1956 kom trommisen Jerry Marotta til verda i Cleveland. Marotta held takten for Robbie Robertson på plata Storywille frå 1991. I 1971 vart datoen prega av at Neil Young var i Quadrofonic Studios i countryhovudstaden Nashville og foreviga songen om mannen han kjøpte den flotte ranchen han eig i California frå, Old Man. Songen om den gamle mannen kan høyrast på plata Harvest, i tillegg til Greatest Hits og ei mengd samleplater. Den versjonen han spelar på DVD-plata Heart Of Gold frå Rhyman Auditorium i Nashville er ikkje å forakte for dei som likar å sjå gamle Neil spele live. I 1996 spelte Dave Matthews og Tim Reynolds akustisk konsert på Luther College i Decorah i Iowa. Hendinga vart spela inn og gjeven ut som dobbel konsertplate i 1999.

Fjerde februar

Fjerde februar 1948 vart predikantsonen Vincent Damon Furnier fødd i Allen Park i Michigan. Alice Cooper tok ikkje artistnamnet sitt etter gruppa han var med å starte i 1966 før i 1972, men i dag er det Furnier som er kjend som Alice Cooper. Både bandet og artisten har hatt fleire storselgjande plater frå starten og utover. I 1963 kom Bryan Mantia til verda i Cupertino i California. Med kallenamnet Brain er Mantia kjend for å halde takten i Primus, han kan også høyrast medan han trommar på songen Big In Japan på Tom Waits si plate Mule Variations frå 1999. I 1967 nådde singelen Hey Joe frå Jimi Hendrix fjerdeplass på dei engelske platelistene. I 1977 gav Fleetwood Mac ut plata Rumours og med det var dei sikra legendestatus for fleire generasjonar framover. I 1980 var den dagen End Of The Century vart slept laus på folket. Dei skinnjakkekledde karane i Ramones hadde spela inn denne plata i Gold Star Studios i solrike California året før. Do You Remember Rock’n Roll Radio og Cinese Rock kan høyrast på plata Ramones Mania. Produsent var legendariske Phil Spector som er kjent for sin Wall Of Sound og slo gjennom som produsent med Da Doo Ron Ron. I 1991 gav Thin Lizzy ut samleplata Dedication: The Very Best Of Thin Lizzy. I 2001 døyde jazzmusikaren J.J. Johnson. I 2003 gav 50 Cent ut plata Get Rich Or Die Tryin’. I 2009 døyde Lux Interior.

Andre februar

I 1942 vart Graham William Nash fødd i tivolibyen Blackpool i eit krigsherja England. Graham Nash slo gjennom med eit brak i den engelske gruppa The Hollies, som etter kvart har fått sitt bidrag til mi platesamling. Nash tok etter kvart turen over dammen og starta eit samarbeid med David Crosby og Stephen Stills i meir kjende Crosby, Stills & Nash (& Young). I 1970 slepte Grand Funk Railroad singelen Heartbreaker som klatra til syttiandreplass på den viktige Billboardlista. I 1976 gav Lynyrd Skynyrd ut singelen Gimme Back My Bullets. I 1980 heldt Toy Dolls konsert i Comerads Club i Blackmill. I 1981 kom Iron Maiden si andre studioplate, Killers. I 1982 nytta dei engelske hardrockarane i Iron Maiden dagen til å sleppe den legendariske singelen Run To The Hills. Singelen der dei oppmodar om fjelltur klatra i dei påfølgjande vekene lett og elegant til sjuandeplassen på dei engelske singellistene. I 1991 fekk verda servert plata 1916 frå våre venner i Motörhead. Plata inneheld ei hylling av dei amerikanske kultpønkarane i Ramones og på tittelsporet, som avsluttar plata, har den aldrande speedfreaken Lemmy bytta ut bass med cello. Det siste får ikkje akkurat gamlingen til å høyrast ut som ein ekte Motörheadbanger, men det er ikkje tvil om at dette duger.

Fyrste februar

Fyrste februar 1939 kom Delano Floyd McCoury til verda i Bakersville i North Carolina. McCoury er gitarist i sitt eige bluegrasband, The Del McCoury Band, der også begge sønene hans, Ronnie og Rob, er med på høvesvis banjo og mandolin. The Del McCoury Band er kjend for å ha eit tett samarbeid med ein av mine store heltar, countryartisten Steve Earle, og dei kan mellom anna høyrast på plata El Corazon frå 1997. Same dag vart pianisten Joe Sample fødd i Houston med fullt namn Joseph Leslie Sample. Joe Sample kan høyrast i elegant tangentleik på plata Amandala, som trompetlegenda Miles Davis gav ut i 1989. I 1950 fekk verda gitaristen Michael Wayne Campbell. Mike Campell er best kjend for arbeidet han har gjort saman med Tom Petty sitt backingband The Heartberakers, men i platesamling er det på Johnny Cash sine plater Unchained frå 1996 og American III: Solitary Man frå 2000 han kan høyrast. I 1980 var både Horden Comrades Club og Shoreline Club i South Shields vertskap for gladpønkarane i Toy Dolls. I 1992 gav The Monkeywrench ut plata Clean As Broke-Dick Dog på plateselskapet Sup Pop Records, same selskap som gjorde Nirvana til verdsstjerner. I 1994 gav Green Day ut si tredje studioplate, Dookie, som sørgja for at bandet fekk fem hittsinglar og klatra så høgt som til andreplass på den renommerte Billboard-lista i USA. I 1995 forsvann Manic Street Preachers sin gitarist, Richey James Edwards, og i ettertid reknar ein det som truleg at dette også er den dagen han omkom etter ein biltur.