Tjuesjuande august

Tjuesjuande august 1964 fekk verda ein Johnny Cash versjon av Bob Dylan sin It Ain’t Me Babe. Songen vart spela inn i Nahsville og kan høyrast på plata Orange Blossom Special. Tony Kanal kom til verda i 1970, han er bassist i den amerikanske gruppa No Doubt. I 1977 kunne ein live-versjon av Lynyrd Skynyrd sin Gimme Back My Bullets kjøpast på ein promosingel frå ein konsert i Anaheim sør for Los Angeles. I 1990 var dette ein tragisk dag då gitarhelten Stevie Ray Vaughan døyde i ei helikopterulukke. I 1991 gav Bob Seger And The Silver Bullet Band ut plata The Fire Inside.

Tjuesjette august

Tjuesjette august 1960 kom den amerikanske jazzsaksofonisten Branford Marsalis til verda i Breaux Bridge i Louisianna. Marsalis kan hjå meg høyrast på Miles Davis si plate Decoy frå 1984. I 1966 kunne platekjøparane skaffe seg singelen I’m A Boy frå The Who. Songen, som handlar om eit par som får høve til å velgje kjønn på barna sine, men som får ein gut isteden for ei jente, vart bandet sin andre #2 låt. I 1969 kom singelen Suspicious Minds frå Elvis Presley. Songen vart løna med ei veke på fyrsteplass i USA, men måtte nøye seg med ein andreplass som bestenotering i England. Same dag kom No Doubt-trommis Adrian Young til verda og ei hardtslåande karriere var byrja. I 2004 steppa metallguden Rob Halford inn som Black Sabbath-vokalist for ein bronkittsjuk Ozzy Osbourne. Konserten denne kvelden var i Camden, New Jersey og vart den fyrste av i alt åtte for superreserven.

Tjuefemte august

Tjuefemte august 1920 fekk verda bassisten Leonard Gaskin. New York-fødde Gaskin, som eigentleg vert rekna som jazzmusikar, kan hjå meg høyrast på Bob Dylan si plate The Freewheelin’ Bob Dylan frå 1963. I 1949 kom Gene Simons til verda i Haifa i Israel som Chaim Witz, eit namn som ikkje sel så godt i rockeindustrien. Simons er kjent som den langtunga bassisten i teikneseriebandet Kiss og skryt av at han har landa fleire damer enn dei fleste andre i same bransje. Underteikna var heldig og fekk oppleve Kiss på Koengen i Bergen 1. juni 2008. Gamlingane leverte eit fantastisk show som heile familien levde lenge på. I 1951 vart eit anna metallikon, Rob Halford, fødd som Robert Arthur Halford. Halford er kjend som vokalist i bandet Judas Priest og vert av fansen referet til som The Metal God, eit tilnamn alle frammøtte på konserten i Bergenshallen 8. juni 2008 vil skrive under på at han har gjort seg fortend til. I 1954 kom Declan Patrik MacManus til verda. MacManus er betre kjend som Elvis Costello og har i tillegg til plater under eige namn gjeve ut plater saman med bandet The Attractions. Han har også samarbeida med verdskjende artistar som Burt Bacharack og kona Diana Kral. I mi platehylle er det foreløpige bidraget plata Mighty Like A Rose frå 1991, men eg lovar at det kjem meir. Costello har også produsert plater for andre artistar, som mellom anna The Pogues. I 1971 var dette dagen The Who gav ut Who’s Next i England. Plata nådde #1 på dei britiske listene. I 1978 var dette dagen plata Who Are You med The Who vart gjeven ut på andre sida av Atlanterhavet. Plata nådde andreplass på dei amerikanske listene. I 1986 var det Rockabillyfest på Klub Foot i Hammersmith og på scenen stod mellom anna Torment, Rochee & The Sarnos, Wigswille Spliffs, The Coffin Nails, The Caravans, alle frå Storbritannia, og nederlandske Batmobile. Alle saman kan høyrast og nytast på plata Stomping at the Klub Foot Vol. 3. I 1988 gav Metallica ut plata …And Justice For All, og no var dei tidlegare garasjerockarane superstjerner. I 1997 gav Rammstein ut plata Sehnsucht og gav med det nytt liv til sjangeren industrimetall.

Tjuefjerde august

Tjuefjerde august 1945 kom multuinstrumentalisten Ken Hensley til verda. Hensley er best kjend som keyboardspelar og låtskrivar i det engelske hardrockbandet Uriah Heep som han spelte saman med frå 1970 til 1980. I 1956 var det Love Me Tender som stod på programmet for Elvis Presley sin innspelingssesjon. I 1981 kunne denne datoen by på konsert med Toy Dolls i Bentley Park i Doncaster. I 1984 stod Dovercot Arts Centre på Toy Dolls sin turnéplan.

Tjuetredje augugst

Tjuetredje august 1947 var fyrste dag på jorda for Keith John Moon. Moon var trommeslagar i The Who og ein av dei beste rocketrommisane som har levd nokon sinne. Moon døyde i 1978. I 1968, det var ein fredag, avslutta Jethro Tull innspelinga av det som skulle verte langspelplata This Was. I tillegg til sjefen sjølv, Ian Anderson, deltok Mick Abrahams på gitar, Clive Bunker på trommer og Glenn Cornick på bass. I 1970 spelar Lou Reed og Velvet Underground sin siste konsert. Hendinga var lagt til Max’s Kansas City i New York. I 1980 varmar Iron Maiden opp for UFO på Reading Festival og spelar for fleir enn tretti tusen, største publikum til då. Så mange var nok ikkje til stades når Toy Dolls spela i Huntington Club i Stanley same dag.

Tjueandre august

Tjueandre august 1963 kom Tori Amos til verda som Myra Ellen Amos. Eg må innrømme at det ikkje er meg som har gått til innkjøp av denne plata, men det let ikkje ille, det dama frå Newton, North Carolina spelar. I 1980 kunne Toy Dolls opplevast i Dixons Club i Sunderland. I 1992 toppa Iron Maiden nok ein gong plakten på Monsters Of Rock på Castle Donnington. Andre langhåra rockarar på plakaten var Skid Row, Slayer, Thunder og W.A.S.P.

Tjuefyrste august

Tjuefyrste august 1952 vart Clashgitarist og vokalist, komponist, produsent og multitalent Joe Strummer fødd som John Mellor i Ankara i Tyrkia. Strummer kan hjå meg høyrst på Clash-plata Sandinista, han er også kreditert som produsent på Pogues-plata Hell’s Ditch og han sang duett med Johnny Cash på ein flott versjon av Bob Marley sin Redemtion Song. I 1962 fekk Johnny Cash vokalhjelp av gruppa The Carter Family då han spela inn Where You There (When You Crusified My Lord?). Underverket enda opp på plata Ring Of Fire. I 1980 gav datoen oss ein Toy Dolls-konsert, den var i Belvedere Club i Bishop Auckland. I 1982 var Toy Dolls i Working Mans Club i Winlaton for å underhalde. I 1984 fekk 100 Club i London vitjing av Toy Dolls. I 1990gav Alice In Cains ut debutplata si, Facelift.

Tjuande august

Tjuande august 1941 kom Hawkwindsjefen Dave Brock til verda med fullt namn David Anthony Brock i Isleworth. Bandleiar Brock er den einaste av medlemmene av Hawkwind som har vore med gjennom heile bandet si karriere. I 1946 var dette fødselsdagen til Ian Clarke som spelte trommer for Uriah Heep i perioden 1971-1972 og kan høyrast på plata Look At Yourself. I 1949 kom den irske bassisten Philip Parris Lynnot til verda i West Bromwich. Lynnot var leiar av det irske bandet Thin Lizzy der han også markerte seg som låtskrivar. Før han starta sitt eige band spelte Lynnot bass i mellom anna eit anna irsk band, Skid Row. Lynnot døyde i 1986 og kan hjå meg høyrast på samleplata Dedication. I 1978 fekk Helsingborg vitjing av Gasolin. Pas På Svinget I Solrød og Strengelengen er foreviga og kan høyrast på samleplata Derudaf - Forever. I 1981 er det Doncaster som tek i mot Toy Dolls, det skal ha hendt i Halfway Hotell, same dag gjesta Ramones Santa Cruz Civic i California, USA. I 1983 var Wings Of A Dove Madness sitt bidrag til hitlistene. Resultatet vart ein andreplass. I 1988 toppa Iron Maiden plakaten på Monsters Of Rock og fekk spele framfor meir enn hundre tusen headbangers & hellraisers på Castle Donnington.

Fjortande august

Fjortande august 1971 fekk det platekjøpande publikummet i USA høve til å kjøpe The Who sitt meisterverk Who’s Next. Plata nådde #4 på dei amerikanske listene. I 1973 var The Who i studioet Eel Pie og la siste hand på låtene Postcard, Now I’m A Farmer, Water og Naked Eye som alle endte opp på Odds & Sods året etter. I 1982 hadde Fowlers Yard i Durham vitjing av Toy Dolls. I 1992 gav Motörhead ut ei plate med tittelen March Ör Die.

Trettande august

Trettande august 1958 fekk studioteknikkarar i Nashville gleda av å høyre Johnny Cash spele inn Lead Me Father. Me andre måtte vente til plata Hymns var tilgjengeleg seinare på året. Han spela også inn Don't Take Your Guns To Town som fekk plass på EP-en The Faboulous Johnny Cash og i tillegg kan høyrast på ei rekkje samleplater, mellom anna Murder frå 2000. I 1973 slepte sørstatsrockarane i Lynyrd Skynyrd plata Prounounced Lehn-nerd Skin-nerd. I 1981 var dette datoen Toy Dolls var i Stanley for å spele i Smuglers Club. I 1982 var det i Walker Park i Newcastle at Toy Dolls kunne høyrast. I 1988 slepte Iron Maiden Evil That Men Do, som plasserte seg på ein femteplass på listene. I 1991 kom Metallica si sjølvtitulerte femteplate.

Tolvte august

Tolvte august 1929 kom countrysongaren Buck Owens til verda som Alvis Edgar Owens Jr i Sherman, Texas. Owens flytta til Bakersfield i California på slutten av 1950-talet og hadde fleire hits som ikkje berre klatra til tops på countrylistene, men også plasserte seg høgt på dei vanlege poplistene. Eg hugsar Owen best fra far min sine gamle langspelplater, men då eg for ei tid tilbake kom over ei CD-plate på Fretex, vart eg hard gripen av nostalgi og investerte halvanna snes i eit eksemplar av Act Naturally. Owens døyde i 2006. I 1976 spelte Ramones live på The Roxy i Hollywood. Hendinga vart festa til band og seksten tidlegare uutgjevne songar inkludert Blitzkrieg Bop og Now I Wanna Sniff Some Glue kan høyrast som tilleggsmateriale på plata Leave Home.

Tiande august

Tiande august 1940 kom gitaristen Jerry Glenn Kennedy til verda i Shreveport, Louisiana. Kennedy spelar gitar for Bob Dylan på plata Blonde On Blonde. I 1947 vart Jethro Tull-sjefen Ian Scott Anderson fødd i Dunfirmline i Fife i Skotland. Anderson har vore leiar av Jetro Tull sidan starten på slutten av 1960-talet. Underteikna var så uheldig å sjå Anderson og Jethro Tull i Grieghallen i Bergen i 2009, men røysta til Anderson var så dårleg at det heile var ganske så skuffande. Då er det betre å hygge seg med platene som står i hylla, This Was, Aqualung, Thick As A Brick, Too Old To Rock & Roll; Too Young To Die, Heavy Horses, Nightcap, Catfish Rising og liveplata A Little Light Music. I tillegg kjem sjølvsagt fleire samleplater. I 1978 kunne ein høyre Gasolin i Tigerstaden. Dei heldige frammøtte fekk mellom anna høyre Det Bedste Til Mig Og Mine Venner, Hvad Gør Vi Nu, Lille Du, Kattemor og Kloden Dreier Stille Rundt som alle er å høyre på Derudaf - Forever. I 1981 gav Bob Dylan ut plata Shot Of Love.

Niande august

Niande august 1955 vart trommeslagaren Charles Morgan fødd i London med fullt namn John Charles Morgan. Morgan sitt trommespel kan høyrast på tittelsporet til Matt Bianco si plate Whose Side Are You On frå 1984. I 1980 kunne Toy Dolls opplevast i Steels Club i Sunderland. I 1983 var Toy Dolls attende i 100 Club i London for å spele. I 1984 er dette datoen for starten av Iron Maiden sin World Slavery Tour. Det var i seg sjølv ei stor hending, i og med at det hendte i Polen som den gong var trygt plassert i den kommunistiske delen av eit delt Europa. I 1986 var det plateslepp for Orgasmatron frå Motörhead. Sjølv venta eg nokre år før eg skaffa meg denne skatten, men no er plata trygt på plass i hylla. I 1987 kunne ein oppleve Toy Dolls på festival i Gronningen. I 1995 døyde Grateful Dead-gitaristen Jerry Garcia.

Åttande august

Åttande august 1937 vart den svenskhollandske visesongaren Cornelis Vreeswijk fødd i Ijmuiden i Nederland. I 1961 kunne Elvis Presley fortelje at (Marie’s The Name) His Latest Flame og fekk med det fire veker på fyrsteplass på hitlistene i England. I USA klatra plata til fjerdeplass som høgaste plassering. I 1968 spelte Johnny Cash inn Oh, What A Dream og All Over Again som begge kan høyrast på samleplata Love frå 2000. I 1984 gav W.A.S.P. ut den sjølvtitulerte debutplata si og rocken vart aldri den same. Sjefen Blackie Lawless trakterte bassen og hadde med seg gitaristane Randy Piper og Cris Holmes i tillegg til trommeslagaren Tony Richards. L.O.V.E. Machine, I Wanna Be Somebody og On Your Knees kan i tillegg høyrast på samleplata First Blood. Last Cuts frå 1993. I 1986 er Toy Dolls på plass på Dollys i Oxford. I 1987 kunne Toy Dolls opplevast på Sneekwave i Sneek.

Sjette august

Sjette august 1937 kom pianisten Paul Griffin til verda i Harlem i New York. Griffin kan mellom anna høyrast på Bob Dylan platene Bring It All Back Home frå 1963 og Highway 61 Revisited frå 1965. Griffin døyde i 2000. I 1952 fekk Green Bay i Wisconsin (home of the Packers) gitaristen og komponisten Pat MacDonald. MacDonald er best kjend som medlem av den alternative duoen Timbuk 3 som fekk debutplata si nominert til Grammy i 1987. Etter at bandet slutta å spele saman i 1995 har MacDonald gjeve ut fleire plater på uavhengige selskap utan den store salssuksessen. Han har derimot tent gode pengar på å skrive songar for andre artistar. I 1967 var The Who i Mirasound Studios i New York og spelte inn tredje versjon av Mary Anne With The Shaky Hand. Songen kom med på plata The Who Sell Out og Al Kooper spelte orgel. I 1986 hadde Warehouse i Dumfermline vitjing av Toy Dolls.

Femte august

Femte august 1947 fekk verda gitaristen Rick Derringer kamuflert som Richard Zehringer. Derringer slo gjennom i gruppa McCoys som er fint plassert i kategorien ”one-hit-wonders” etter kjempesuksessen med Hang On Sloopy, men i mi platehylle gjer han jobben som hjelpegitarist og produsent for Johnny Winter på plata And Live frå 1971. I 1961 kom violinisten Mark O’Connor til verda i Seattle. O’Connor kan hjå meg høyrast saman med bandet Telluride på Nothing But A Child på Steve Earle si plate Copperhead Road frå 1988. I 1968 nytta gitaristen Luther Perkins dagen til å dra sitt siste sukk etter ei tids sjukdom. I 1986 var Toy Dolls i skotske Ayr for å spele på Darlington Hotel.

Fyrste august

Fyrste august 1942 vart Jerome John Garcia fødd. Jerry Garcia var ein av grunnleggarane av kulthippiebandet Grateful Dead og vart rekna som talsmann for bandet fram til han døyde i 1995. Garcia hadde i tillegg sitt eige band, Jerry Garcia Band i tillegg til ei rekkje andre samarbeidsprosjekt. I tillegg til ei Grateful Dead liveplate frå 1964 kan Garcia i mi platesamling høyrast på samarbeidsplata Dylan & The Dead frå 1989. I 1966 var The Who i IBC Studios i London og spelte inn I’m A Boy. Produsent var Kit Lambert. I 1972 var dagen Elvis Presley slepte singelen Burning Love. Songen var Elvis sin siste rockehit og fekk ei veke på listetoppen i USA. I England var sjuandeplassen beste plassering. I 1982 køyrde Madness bil inn på listene. Drivin In My Car la seg inn på ein fjerdeplass.

Trettiande juli

Trettiande juli 1946 kom Jeffrey Hammond til verda i badebyen Blackpool. Hammond laga god basslyd i Jethro Tull i åra frå 1971 til 1975 og kan hjå meg høyrast på platene Aqualung og Thick As A Brick. I 1955 var Johnny Cash i legendariske Sun Studios, der Sam Phillips regjerte, og spelte inn Folsom Prison Blues. Songen vart gjeven ut som Sun Reccords sin single nummer 232 og er i tillegg tilgjengeleg på ei rekkje samleplater, mellom anna plata Murder frå 2000. I 1968 kom Sean Moore til verda i Pontypool i Wales. Moore er trommeslagar i bandet Manic Street Preachers og kan hjå meg høyrast medan han held takten på platene Generation Terrorists (1992), Gold Against The Soul (1993), The Holy Bible (1994) og This Is My Truth Tell Me Yours (1998). I 1983 fekk Motörhead singelen Shine/Hooche Coochie Man (Live) ut på marknaden.

Tjueåttande juli

Tjueåttande juli 1943 vart gitaristen Michael Bernard Bloomfield fødd i Chicago. Blomfield kan i mi platesamling høyrast medan han spelar gitar på Bob Dylan si plate Highway 61 Revisited frå 1965. I 1983 spela Men at Work i Merriweather Post Pavillion i Columbia, Marryland og hendinga vart spela inn av ABC Rock Radio Network. Songen I like to (live) kan høyrast på B-sida av singelen Dr Heckyll & Mr Jive og samleplata Contraband: The Best of. I 1986 gav Neil Young ut plata Landing On Water på plateselskapet Geffen.

Tjuesjette juli

Tjuesjette juli 1943 kom det ein kar med namnet Michael Phillip Jagger til verda. Mick Jagger er best kjend som songar i Rolling Stones og for låtskrivar samarbeidet med Keith Richard og ikkje minst for forhold til fleire profilerte fotomodellar. I mi platehylle står ei av gamle Mick sine soloalbum, Wandering Spirit frå 1993. I 1980 stod Toy Dolls på scenen i Labour Club i Hordon. I 1990 døyde Brent Mydland.

Tjuefemte juli

Tjuefemte juli 1950 kom Mark Clarke til verda i Liverpool. Clarke kan hjå meg høyrast medan han spelar bass på Uriah Heep-songen The Wizzard som han var med å komponere. Songen kan høyrast på plata Demons And Wizzards frå 1972. I 1955 kom Jeremy Finer til verda i pottemakarbyen Stoke-On-Trent. Jem Finer var ein av grunnlegganane av folkpunk gruppa The Pogues der han gir sitt bidrag til lydbiletet ved å spele banjo og ein del andre strengeinstrument. Han kan også høyrast saman med resten av The Pogues på Johnny Come Lately frå Steve Earle si plate Copperhead Road frå 1988. I 1980 gav AC/DC ut plata Back In Black. Plata er det mest selde hardrockalbumet nokon sinne og eg eig vidunderet både på langspelplate og kompaktdisk. I 1982 kunne Toy Dolls høyrast på Shineyrow Club i Sunderland.

Tjuefjerde juli

Tjuefjerde juli 1958 var Johnny Cash i Nashville og spela inn It was Jesus. I tillegg til det faste bandet med Luther Perkins på gitar og Marshall Grant på bass var Murray M. ”Buddy” Harman med på trommer, Marvin Hughes sat bak pianoet og Don Helms spela steel guitar. Songen vart gjeve ut i både stereo og mono og kan høyrast på plata Hymns som vart produsert av Don Law. Songen kan også høyrast på samleplata Love frå 2000. Same dato i 1973 vart songen Tiger Whitehead foreviga. Artist var Johnny Cash og denne songen kan høyrast på The Johnny Cash childrens album. I 1987 døyde Dick Wellstood.

Tjuetredje juli

Tjuetredje juli 1928 kom bassisten William James Edwards Lee til verda i Snow Hill i Alabama. Bill Lee sitt basspel kan høyrast hjå artistar som Harry Bellafonte og Aretha Franklin, men i mi platesamling er det på Bob Dylan si plate Bring It All Back Home frå 1965 ein kan høyre han. I 1970 var Jimi Hendrix i studio med Band Of Gypsies og spelte inn Angel, som seinare vart ein hit for den skotske fotballentusiasten Rod Stewart. I 1982 var det høve for publikum på Honeysuckle i Gateshead å høyre Toy Dolls. I 1984 hadde Toy Dolls teke turen til Hollywood for å spele på Logics.

Tjueandre juli

Tjueandre juli 1941 vart George Clinton fødd i Kennapolis i North Carolina. Clinton er i tillegg til eiga solokarriere, kjend frå band som Funkadellics og han vert rekna som kongen av funk. Hjå meg kan Clinton høyrast på plata Greates Hits som oppsummerar noko av det beste han gjorde før me gjekk inn i det nye milleniumet. I 1970 nytta gitarhelten Jimi Hendrix datoen til å fullføre innspelinga av In From The Storm i Electric Ladyland Studios. I 1984 stod Music Machine i Santa Monica som vertskap for Toy Dolls.