Syttande oktober

Syttande oktober 1923 kom Barney Kessel til verda i Muskogee i Oklahoma. Jazzgitaristen Kessel var ein viktig del av gruppa av studiomusikarar som vart omtala som The Wrecking Crew. I mi platehylle kan Kessel sitt gitarspel høyrast på utvalde spor på samleplata 30 #1 Hits, som dødsbuet etter rockekongen Elvis Presley slepte i 2002. Kessel døyde i 2004. I 1934 vart Emmanuel Rodriguez fødd i Havanna på Cuba. Trombonisten Rico Rodriguez lærte å traktere instrumentet sitt i rastafarimiljøet i Kingston på Jamaica, før han kom til Storbritannia i 1961 for å spele i ulike reggae-band. Rodriguez gav ut plater under eige namn, var ein høgt skatta gjestemusikar, og spelte i fleire år fast i Jools Holland sitt band. Hjå meg finn du Rodriguez sitt trombonespel på The Specials si sjølvtittulerte debutplate frå 1979. Rodriguez døyde i 2015. I 1957 vart italienskætta Pino Palladino fødd i den waliske hovudstaden Cardiff. Palladino har spela med artistar som Jools Holland og Paul Simon, og han erstatta John Entwistle i The Who. Hjå meg høyrer du bassisten Palladino sitt arbeid på plata Word Of Mouth, som Mike + The Mechanics slepte i 1991, Melissa Etheridge si plate Yes, I Am frå 1993, Tina Turner si plate Twenty Four Seven, og på gitarlegenda Jeff Beck si plate Who Else!, begge dei to siste frå 1999. I 1967 kom Roberto Salvatore Cani til verda i den italienske motemetropolen Milano. Den prisløna fiolinisten Roberto Cani kan i mi platehylle høyrast medan han spelar for Meat Loaf på studioplata Bat Out Of Hell III: The Monster Is Loose frå 2006. I 1968 fekk reggae-artisten Bob Marley ein son som han gav namnet David Nesta Marley. Marley junior tok etter kvart namnet Ziggy Marley og slo seg saman med bandet The Melody Makers, som han har turnert og gjeve ut plater saman med. I dag er dette samarbeidet avslutta, men i mi platehylle står ein lemning frå 1989, plata One Bright Day. I 1969 vart rapparen og produsenten Wyclef Jeanelle Jean fødd på Haiti. Wyclef Jean hadde fleire store hist med bandet The Fugees og kan i mi platehylle høyrast på plata The Score frå 1996. I 1971 kom Blues Saraceno til verda i Hartford i Connecticut. Den tidlegare Poison-gitaristen Saraceno kan i mi platehylle høyrast på Melissa Etheridge si plate Lucky frå 2004. I 1972 kom Marshall Bruce Matters III til verda i Saint Joseph i Missouri. Eminem har, som soloartist og saman med rap-kollektivet D12, selt millionar av plater. Hjå meg kan Eminem nytast på soloplatene The Slim Shady LP (1999), The Marshall Matters LP frå 2000, og The Eminem Show, som kom på marknaden i 2002, i tillegg til D12 si debutplate Devil’s Night frå 2001. I 1975 vart Adrián Terrazas-Gonzáles til verda i meksikanske Chihuahua. Adrián Terrazas-Gonzáles trakterar ei rekkje blåseinstrument og hjå meg kan han høyrast frå tida han spelte i The Mars Voltas på plata The Bedlam In Goliath frå 2008. I 1977 gav sørstatsrockarane Lynyrd Skynyrd ut plata Street Survivors, med mellom anna låtar som That Smell, I Know A Little og You Got That Right. I 1985 kom Toy Dolls til Schwindkircmen i Dorfen. I 1986 var dei same Toy Dolls på plass i den norske hovudstaden og spelte på Sardines. Og i 1987 kunne Toy Dolls opplevast i N.J.C i Listeux. I 1988 slepte Steve Earle plata Copperhead Road. I 1994 slepte Black Sabbath ei samling av dei beste innspelingane frå tida Ozzy Osbourne var vokalist i bandet. Samlinga fekk det treffande namnet The Ozzy Osbourne Years og var fordelt på tre CD-plater. Og Yello slepte si åttande studioplate, Zebra. I 2000 døyde Joachim Nielsen, same dag som Johnny Cash gav ut plata American III: Solitary Man. Som tittelen indikerer var dette den tredje plata i serien American Recordings. I 2002 døyde Chuck Domanico. I 2003 døyde Robbie King, ein kanadisk multiinstrumentalist som i mi platehylle kan høyrast på studioplatene From The Inside, som Alice Cooper slepte i 1978, og Waking Up The Neighbours, som var Bryan Adams sitt bidrag til populærkulturen i 1991. I 2005 slepte Depeche Mode sitt ellevte studioalbum, Playing The Angel, laus på uskuldege platekjøparar. I 2007 slepte Kent si sjuande studioplate Tillbaka Till Samtiden. I 2010 døyde Dennis Taylor.