Tiande desember

Tiande desember 1959 vart Wolf Hoffmann fødd i tyske Mainz. Accept-gitaristen Hoffmann kan hjå meg høyrast på Accept si femte studioplate Balls To The Wall frå 1983. I 1972 kom Odd Nordstoga til verda i Vinje i Telemark. Hjå meg kan Nordstoga høyrast medan han spelar accordion på Katzenjammer si plate Le Pop frå 2008. I 1974 vart Megan Martha White fødd i Grosse Point Farms i Michigan. Meg White spelte trommer i The White Stripes gjennom heile bandet si karriere og kan hjå meg høyrast med stødige taktslag på plata White Blood Cells frå 2001. I 1981 hadde AC/DC teke turen over grensa til Canada og spelte fyrste konsert av to i Maple Leaf Gardens i Toronto. I 1982 var Toy Dolls i 101 Club i Ferryhill. I 1985 platedebuterte Fine Young Cannibals med ei sjølvtittelert plate som inneheldt ein fantastisk versjon av sjølvaste kongen, Elvis Presley, sin slagar Suspicious Minds. I 1999 døyde Rick Danko. I 2003 kom Offspring si sjuande studioplate ut akkurat i tide for julehandelen, den fekk tittelen Splinter.