Tjuetredje januar

Tjuetredje januar 1926 vart bassisten Curtis Counce fødd i Los Angeles. Counce sitt kjenslege basspel kan hjå meg høyrast på samleplata Best Of Chet Baker Plays. Counce døyde i 1963. I 1953 var dette dagen Cheap Trick-vokalisten Robin Zander kom til verda i Beloit. Zander si gjennomtrengande røyst har hypnotisert jenter i alle aldrar sidan bandet starta og er perfekt til å framføre gitarist Rick Nielsen sine surrealistiske songar. I 1956 vart Ralph Carney fødd i Akron i Ohio. Carney lev av å traktere ei rekkje blåseinstrument og kan i mi platehylle høyrast medan han spelar både trompet og saksofon på Tom Waits si plate Mule Variations frå 1999. I 1959 fekk Johnny Cash hjelp av produsent Don Law til å spele inn ti songar i Nashville, alle kan høyrast på plata Hymns og vert her ramsa opp i tilfeldig rekkefølgje: I Saw A Man; Are All The Children In; Lead Me Gently Home; Snow In His Hair; I Call Him; These Things Shall Pass; He’ll Be A Friend; God Will; The Old Account; Swing Low, Sweet Chariot. Dei to siste kan også høyrast på samleplata God frå 2000. I 1985 er Toy Dolls igjen over grensa til Sveits for å spele på Rote Fabrik i bankbyen Zürich. I 1986 spelte Toy Dolls på gata i Sacramento.