Tjuefjerde februar

Tjuefjerde februar 1902 vart Donald Firth Law fødd i London. Produsenten Don Law produserte ei rekkje av Johnny Cash sine tidlege plater, mellom anna Ride This Train frå 1960. I 1942 kom Paul Pond til verda i den engelske hamnebyen Portsmouth. Paul Jones var med å starte The Blues Band i 1979, han hadde tidlegare gjort seg merkt som vokalist i, mellom anna, meir kjende Mannfred Mann. I 1950 vart gitaristen George Thorogood fødd i Wilmington. Delaware-stasjonerte Thorogood har sidan 1974 hamra feite riff og dårlege vitsar laus på uskuldige tilhøyrarar og er best kjend for slageren Bad To The Bone, som har vore nytta som filmmusikk i fleire filmar enn eg kan telje på begge hender. Hjå meg er Thorogood representert med to gode samlingar som dekkar det meste og det beste, eller det verste, som mannen sjølv ville sagt, av det han har gjort saman med The Delaware Destroyers. I 1951 vart bassisten Steve Dawson fødd i Sheffield. Dawson er ein av grunnleggjarane av det engelske hardrockbandet Saxon, og i mi platesamling kan han høyrast på plata Wheels Of Steel frå 1980. I 1969 hadde Johnny Cash teke turen San Quentin State Prison i California for å spele for dei mange innsette. I 1983 hadde karane i Toy Dolls teke turen til Skottland, nærare bestemt Glasgow, der dei spelte på Roxy. I 1985 var turen komen for ein Toy Dolls-konsert på Queens Hotel i Westcliffe. I 1994 gav det engelske metallbandet Cradle Of Filth ut debutplata si, The Principle Of Evil Made Flesh.