Andre februar

Ein gong i tida hadde eg ein hund som var fødd andre februar, og, bortskjemd som han var, fekk han blautkake servert på eige fat kvar gong han hadde bursdag. For dei som ikkje har eit forhold til hundar med krembart vert denne datoen hugsa for at Toy Dolls heldt konsert i Comerads Club i Blackmill, det var i 1980. I 1982 nytta dei engelske hardrokkarane i Iron Maiden dagen til å sleppe den legendariske singelen Run To The Hills. Singelen der dei oppmodar om fjelltur klatra i dei påfølgande vekene lett og elegant til sjuandeplassen på dei engelske singellistene. I 1991 fekk verda servert plata 1916 frå våre venner i Motörhead. Plata inneheld ei hylling av dei amerikanske kultpunkarane i Ramones og på tittelsporet, som avsluttar plata, har den aldrande speedfreaken Lemmy bytta ut bass med cello. Det sitste får ikkje gamlingen til å høyrast ut som ein ekte Motörheadbanger, men det er ikkje tvil om at dette duger.