Tjuande januar

Tjuande januar 1929 kom trommeslagaren Jimmy Wilbur Cobb til verda i Washington D.C. Cobb kan hjå meg høyrast medan han held takten for Miles Davis på plata Someday My Prince Will Come frå 1961. I 1945 fekk verda musikaren Eric Michael Stewart. Eric Stewart tenestegjorde i 10cc frå 1972 til 1995. I 1948 vart trommeslagaren Melvin Paul Pritchard fødd i Oldham. Mel Pritchard heldt, fram til han døyde av eit hjarteinfarkt i 2004, takten for Barclay James Harvest. I 1951 kom bassisten Ian Frank Hill til verda i West Bromwich. Hill har tent sitt daglege brød som ein del av rytmeseksjonen i Judas Priest. I 1952 kom Kiss-gitarist og vokalist og posørrockar nummer ein Paul Stanley til verda i New York med det karismatiske namnet Stanley Harvey Eisen. Unge Stanley sitt bidrag til rocken har kan hende ikkje alltid hausta like stor åtgaum, men han er, om ein skal tru pressa, musikalsk ansvarlig i Kiss og det seier sitt. I 1961 var Elvis Presley i studio og spela inn In The Ghetto. I 1968 fekk Dylan-låten All Along The Watchtower evig liv i Jimi Hendrix Experience sin versjon. Singelen nådde sjetteplass i England, medan USA løna prestasjonen med ein tjuandeplass. I 1969 kom Nicholas Allen Jones til verda i walisiske Blackwood. Under artistnamnet Nicky Wire har Jones gjort suksess som bassist i det walisiske rockebandet Manic Street Preachers. Fredag tjuande januar 1985 var Brøndby-hallen i København åstad for ein konsert med metallikona i Judas Priest. Dei som ikkje nådde fram til kongens by, men som tilfeldigvis oppheldt seg i Stuttgart kunne i staden oppleve Toy Dolls på Krockodil. I 1986 fekk Palo Alto vitjing av Toy Dolls, dei kunne høyrast på The Stone. I 1996 døyde jazzmusikaren Gerry Mulligan.